حوار مع شهيد

فى يوم عادى من ايامى العادية وانا فى غرفتى لوحدى بمارس هوايتى المفضلة و بقرأ كتاب ومستغرقة فى القرأة
فجأة!!!!
لقيت صوت بيتكلم و بيقول " ممكن لحظة لو سمحتى "
فضلت ابص جمبى و ورايا مش لاقية حد انا لوحدى بس متأكدة انى سمعت صوت
قولت اعوذ بالله من الشيطان يمكن بتخيل رجعت ركزت فى الكتاب تانى
سمعت الصوت تانى " لو سمحتى ممكن تبصيلى ثوانى "
و فجأة لقيت قدامى واحد !!!!!!!!!!!!!!!!!!!
من الصدمة كل مافيا اتجمد حتى صوتى ولا قدرت اصرخ و فضلت واقفة بصالوا و عايزة اقول انت مين ؟؟؟؟؟؟ بس صوتى مش طالع
فهو قالى ما تتخضيش كدة
انا شهيد من شهداء 25 يناير وجاى اسألك كام سؤال وماشى عالطول
قلتلو :شهيد !!!!! و اتخضيت اكتر ماكنت مخضوضة
قالى: اة انا شهيد و لية اتخضيتى كدة
قلتلوا : اصل اول مرة اشوف حد ميت !!
قالى : ومين قالك انى ميت "وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ . فَرِحِينَ بِمَا آَتَاهُمُ اللَّهُ مِنْ فَضْلِهِ " فأنا مش بعتبر نفسى ميت
قلتلوا : والله عندك حق ياريتنى اموت شهيدة ..اللهم ارزقنا الشهادة
قالى: اللهم امين ..دة احلى حاجة ممكن تحصل لاى بنى ادم انو يموت فى سبيل هدف و اعظم حاجة انو يموت عشان بلدوا واهلوا و ناسوا عشان كدة انا فرحان انى موت فى الثورة و مش بعتبر نفسى موت
............وكانت على وجهة ابتسامة رضا مشفتش زيها فى حياتى .....قالى : المهم عشان ماطولش عليكى انا جاى اسألك كام سؤال
قلتلو :اتفضل اكيد
قالى : اهلى اية اخبارهم حد بيسأل عليهم حد بيساعدهم ؟؟؟اصل كنت انا العائل الوحيد ليهم وهما كانوا معتمدين عليا فى الاكل و الدواء و مصاريف اخواتى
قلتلو : ( وانا مش عارفة اودى وشي فين من الكسوف)..........بص والله انا سمعت انهم بينشأوا صندوق لرعاية اهالى الشهداء و مصابى الثورة
قالى : سمعتى ؟؟؟ ولسة بينشئوا ؟؟؟ افهم من كدة ان اهلى بعد ماسبتهم مالقوش حد يصرف عليهم !!!
لحظة صمت مع نظرة مليانة لوم و عتاب منو ليا .. وانا واقفة ولا عارفة اقول حاجة
قالى : طيب ربنا يتولاهم انشاء الله , طيب اية اخبار الثورة مكملين فيها ايد واحدة زى ما كنا ؟؟
قلتلوا : والله هو دلوقتى فى ناس الدستور اولا و ناس الانتخبات اولا و ناس اعتصام لاء و ناس اعتصام اة و رجعنا نقول اخوان و سلفيين و ليبراليين وحتى فى التحرير كل حزب بقى لية منصة و لية طلبات مختلفة
قالى : معقول !!!!!!! معقول الى بتقولية دة !!!!!!!!!! دة كان سر نجاح الثورة ان كانا كنا حاجة واحدة وكنا بنقول " الشعب يريد " كنا ارادة واحدة ...لحقوا يفرقونا لحقنا نبقى احزاب دة انا قولت ععمرنا ما هنرجع لورا تانى !!!
طيب البلد بقيت احسن ؟؟
قلتلو: زى ماهى......لسة ناس بتاخد رشاوى لسة ناس مش لاقيين عيش لسة الشباب قاعدة على القهوة ضيف على كدة حالة فوضى و بلطجة
قالى : اية الى بتقولية دة ؟؟ انتى متأكدة انك بتكلمى على مصر ؟؟؟اللى حصل فيها ثورة 25 اللى فيها ميدان الشهداء ميدان التحرير ؟؟
قلتلوا : اة للاسف هية
قالى : لاحول ولا قوة الا بالله ... طيب مبارك و جمال و احمد عز ...اتحكم عليهم بأية
قلتلوا : لسة ماتحاكموش اصلا
قالى :اييييييييييية ازاى دة فات 6 شهور
قالى : طب العادلى
قلتلوا : خد 5 سنين
قالى :هى تهمة القتل بقيت 5 سنين ؟؟
قلتلوا : ماهو ماتحاكمش لسة على قتل المتظاهرين
قالى : لاحول ولا قوة الا بالله ... طيب الظابط الى قاتلنى ؟؟
قلتلوا : " وانا بحاول استجمع قوتى كلها عشان اقدر اقول " لاء دول بئة خدوا برأة
لحظة صمت طويييييييييييييييييلة ...
بعدها لقيت عنيه كلها دموع و قال
"ياخد برأة بعد ماقتلنى ...يأخد برأة بعد ما قتل اصحابى ...ياخد برأة بعد ما شفتو مصوب البندقية نحيتى و عنيه كلها شر و بيقولى ابقى خلى الثورة و المظاهرات تنفعك بعد ماخد عمرك .."
"مصر ماتبقاش احسن ولا الثورة تكمل ولا اهلى حد سأل عنهم ولا بيساعدهم .. هى دى البلد الى ضحيت بحياتى عشان تبقى احلى ..هما دول الناس الى ضحيت عشانهم بعمرى عشان حياتهم تبقى احلى ولا بيجبولى حقى من الى قاتلنى ولا بيسألوا على اهلى "
"انا دلوقتى بس حسيت انى موت انا دلوقتى بس حاسس انى ندمان ...يخسااااااااااااااااااااااااااااااارة "
------------طبعا دة مش حقيقى و دة الى تخيلتوا لو حصل حوار بينى و بين حد من الشهداء هنقولوا اية ؟؟؟ هو عمل اقصى حاجة ممكن حد يعملها ضحى بحياتة
احنا عملنا اية بقى ؟؟... ولا اهلوا عارفين هما عامليين اية فى كتير من الشهداء كانوا هما مصدر الفلوس الوحيد لاهلهم
ولا جبنلهم حقهم
ولا حتى خلينا البلد الى ضحوا عشنها احسن
يعنى شعار " ياشهيد نام وارتاح واحنا نكمل الكفاح " دة كان اى كلام
انا بعد ما تخيلت الحوار دة نزلت التحرير وكتيت لوحة كبيرة "حاكموا قتلة الشهداء او الحقونا بهم لاننا لن ننساهم " و خدت عهد على نفسى مش هيبقى مجرد شعار دة هيبقى فعل .لأن دة المفروض يبقى تصرف كل واحد مصرى